1. gr. Félagið heitir Félagsráðgjafafélag Íslands.
Heimili þess og varnarþing er í Reykjavík. Félagið sem heild á aðild að Bandalagi háskólamanna.
 
2. gr. Markmið félagsins eru:
1. Að gæta sameiginlegra hagsmuna félagsmanna sinna í hvívetna og semja um kaup og kjör félagsmanna.
2. Að gæta þess að þeir sem starfa við félagsráðgjöf uppfylli fyllstu kröfur um menntun og siðfræði sbr. siðareglur félagsráðgjafa í starfi.
3. Að efla félagsráðgjöf, jafnframt því að stuðla að fullri viðurkenningu félagsráðgjafar sem sérhæfðrar starfsgreinar.
4. Að stuðla að aukinni hagnýtingu félagsráðgjafar sem vísindagreinar og koma sjónarmiðum hennar á framfæri.
5. Að efla samheldni með félagsráðgjöfum á Íslandi.
6. Að hafa samstarf við samtök félagsráðgjafa erlendis.
 
3. gr. Félagsmenn.
Félagsmenn geta þeir einir orðið sem lokið hafa námi frá viðurkenndum háskólum og fengið starfsleyfi á Íslandi. Félagsráðgjafafélag Íslands áskilur sér rétt í samráði við Félagsráðgjafadeild Háskóla Íslands til að meta hvaða skólar eru viðurkenndir. Skriflega inntökubeiðni í Félagsráðgjafafélag Íslands skal senda til félagsins ásamt prófskírteini í félagsráðgjöf auk starfsleyfis á Íslandi. Félagsaðild að FÍ er þrenns konar:  1. Stéttarfélagsaðild þar sem félagið sér um kjarabundinn samningsrétt.  2. Fagfélagsaðild fyrir þá sem greiða eingöngu fagfélagsgjald  3. Félagsráðgjafanemar og samtök þeirra geta sótt um aukaaðild að félaginu.

4. gr. Stéttarfélags- og fagfélagsgjöld.
Nýir félagsmenn sem ganga inn í félagið á starfsárinu greiði félagsgjöld miðað við hvenær á starfsárinu þeir ganga í félagið.
1. Stéttarfélagsgjald er ákveðið hlutfall af dagvinnulaunum. Hluti félagsgjalds skal renna í vinnudeilusjóð. Stéttarfélagsgjald og greiðslur í vinnudeilusjóð ákveðist á aðalfundi.
2. Fagfélagsgjald er ákveðið á aðalfundi.
3. Félagsráðgjafanemar greiða ekki félagsgjald.
4. Lífeyrisþegar og þeir sem eru atvinnulausir eða sjúkir greiða ekki fagfélagsgjald.
5. gr. Deildir innan Félagsráðgjafafélags Íslands.
Félagsmönnum er heimilt í samráði við stjórn félagsins að stofna landshlutadeildir eða sérstakar fagdeildir, sem vinna að sérstökum sviðum innan félagsráðgjafar. Deildirnar setji sér starfsreglur sem staðfestar skulu af stjórn Félagsráðgjafafélags Íslands.

6. gr. Vinnudeilusjóður.
Markmiðið með vinnudeilusjóði er að styrkja stöðu félaga sinna í vinnudeilum.
Stjórn FÍ ákveði upphæð og úthlutunarreglur hverju sinni í samræmi við fjárhag sjóðsins. Umsóknir skulu berast til stjórnar FÍ.

7. gr. Aðalfundur.
Aðalfundur hefur æðsta vald í málefnum félagsins. Hann er haldinn í mars mánuði ár hvert. Skal til hans boðað skriflega eða með auglýsingu með tveggja vikna fyrirvara hið minnsta. Aðalfundarboði skulu fylgja tillögur til lagabreytinga. Aðalfundur er því aðeins löglegur, að löglega sé til hans boðað. Afl atkvæða ræður úrslitum mála nema annars sé getið í lögum. Atkvæðisbærir félagar á aðalfundi eru þeir sem greitt hafa félagsgjald ársins á undan. Á aðalfundi skulu vera eftirfarandi mál á dagskrá:
1. Fundur settur.
2. Skipan fundarstjóra og fundarritara.
3. Staðfest lögmæti fundarins.
4. Skýrslur fastanefnda skv. 9. lið.                                   
5. Skýrsla stjórnar um starf félagsins á liðnu ári.
6. Skýrsla stjórnar um reikninga félagsins, vinnudeilusjóð og nefndir eftir atvikum.
Reikningar félagsins skulu endurskoðaðir af löggildum endurskoðanda og lagðir fram til samþykktar á aðalfundi.
7. Stéttarfélagsgjald og fagfélagsgjald ákveðið til eins árs, svo og framlag/hlutfall stéttarfélagsgjalds í vinnudeilusjóð.
8. Lagabreytingar. Tillögur um breytingar á lögum félagsins skal senda til stjórnar skriflega ásamt rökstuddri greinargerð, í síðasta lagi 1. febrúar ár hvert.  Breytingartillaga skal birt orðrétt í fundarboði þess aðalfundar er ræðir hana.  2/3 hluta atkvæða þarf til breytinga á lögum.
9. Stjórn félagsins. Kosið skal á aðalfundi um fulltrúa í stjórn félagsins. Kjör í fastanefndir félagsins, siðanefnd, kjaranefnd, sérfræðimatsnefnd og vísindanefnd fer fram á aðalfundi. Fulltrúar í stjórn félagsins skulu kosnir til tveggja ára í senn. Kosið er sérstaklega um formann félagsins til tveggja ára í senn.
10.  Önnur mál.
11.  Fundi slitið.

8. gr. Stjórn félagsins.  Stórn félagsins skipa sjö menn og ber hún ábyrgð á störfum félagsins. Stjórn skiptir með sér hlutverkum varaformanns, ritara, gjaldkera og meðstjórnenda. Að öðru leiti skal stjórn skipta með sér verkum og setja sér starfsreglur. Auk venjulegra stjórnarstarfa er stjórn falið eftirfarandi:
1. Að boða til félagsfunda.
2. Að halda úti heimasíðu þar sem fram koma upplýsingar og tilkynningar varðandi störf félagsins, kjarasamninga, málþing og ráðstefnur, starfatorg og annað.
3. Að hafa frumkvæði að réttinda- og hagsmunamálum félaga svo og einnig um vernd starfsheitis samkvæmt lögum um félagsráðgjöf nr. 95/1990.
4. Að afla upplýsinga um menntun þeirra sem sækja um löggildingu og/eða félagsréttindi og veita umsögn um þessi réttindi svo og veita inngöngu nýjum félögum.

9. gr. Réttindi og skyldur félagsmanna.
1. Félagsmenn skulu fara að lögum félagsins, lögum númer 95/1990 um félagsráðgjöf og kynna sér siðareglur félagsráðgjafa.
2. Félagið skal að fremsta megni stuðla að því að félögum séu búnar viðeigandi starfsaðstæður. Sérstaklega skal þess gætt þegar að ný störf koma til.
3. Hafi félagsmaður ekki greitt félagsgjald til félagsins í tvö ár missir hann félagsréttindi sín, enda hafi hann áður verið krafinn um greiðslu.
4. Óski félagsmaður að ganga úr félaginu geri hann það skriflega.

10. gr. Félagsslit. Slíta má félaginu á fundi sem hefur verið boðaður sérstaklega í því skyni, ef 2/3 hlutar félagsmanna æskja þess, enda sæki 2/3 hlutar atkvæðisbærra félagsmanna fundinn. Eignum félagsins skal ráðstafað í samræmi við ákvörðun meirihluta félagsmanna.

11. gr. Með samþykki þessara laga falla þegar úr gildi eldri lög félagsins.

Samþykkt á aðalfundi félagsins 30. mars 2009